Enerxía Comunitaria SL está a desenvolver unha serie de encontros con persoas e entidades para presentar o seu proxecto. Desta volta acudimos a Santiago para visitar a Recursos de Galicia (RdG), unha empresa público privada coa que compartimos obxectivos: ambas queremos achegar os beneficios da transición enerxética ás comunidades locais.

Obviamente, Recursos de Galicia é unha iniciativa máis ampla, máis forte e máis diversa do que é Enerxía Comunitaria SL. Pero durante a reunión mantida co seu Conselleiro Delegado, Emilio Bruquetas, e coa responsable de comunicación, Cruz Devesa, foi reconfortante identificar a vocación común de soberanía sobre os recursos do territorio. Así mesmo, coincidimos na necesidade de un maior desenvolvemento das enerxías renovables en Galicia que permita mellorar calidade de vida de todos os actores participantes sen comprometer os valores ambientais, culturais e identitarios.

É dicir, ambas empresas coincidimos na necesidade de incrementar o retorno económico dos proxectos eólicos no territorio, e de procurar unha maior aceptación social.
Recursos de Galicia expresou que a súa colaboración coa proposta de Enerxía Comunitaria pode encadrarse en varios ámbitos. En primeiro lugar, puxeron á disposición de Enerxía Comunitaria todos os seus recursos humanos para definir o proxecto inicial, é dicir, para plasmar o primeiro parque eólico comunitario nun proxecto viable e alcanzable no curto prazo. En segundo lugar, o Conselleiro Delegado comprometeuse a tratar dentro das súas estruturas a posibilidade de que RdG sexa parte do capital social de Enerxía Comunitaria. Finalmente, RdG ofreceu a opción de que a produción eléctrica do parque comunitario comunitaria cando opere sexa parte da comercialización que vai realizar directamente RdG.

Recursos de Galicia é unha ventá de ar fresco para a transición enerxética comunitaria. E o Código Ético e o Pacto de Socios do Enerxía Comunitaria encaixan perfectamente con ese obxectivo compartido.